By Գալյա Թադևոսյան 
Ինչպես տեղեկանում ենք ֆեյսբուքյան օգտատեր Նաիրի Սարգսյանի էջից, կարծես թե վերջապես սայլը տեղից շարժվում է ու գուցե սկսվի «Հյուսիս-հարավ» ավտոճանապարհի՝ Մալաթիա-Սեբաստիա վարչական շրջանում ճանապարհաշինարարական աշխատանքները։
Այսօր՝ փետրվարի 26-ին, ինչպես տեղից հայտնում է ֆոտոլրագրող Գագիկ Շամշյանը, այս ճանապարհի կառուցումը երկար տարիների պատմություն ունի։ Պատճառը, ինչպես նշվում է, որոշ չինովնիկների անգործությունն է։
Այս ճանապարհի մասին ֆոտոռեպորտաժներ և տեսանյութեր արդեն մի քանի անգամ են հրապարակվել՝ ցույց տալով, թե ինչ բարձիթողի վիճակում է գտնվում տարածքը և որտեղ կուտակված է կենցաղային ու շինարարական աղբ։
Ամեն անգամ նման նյութեր հրապարակելուց հետո պատասխանատու մարմինները սկսում էին ցուցաբերել «Խաթաբալադա» ֆիլմի սգո թափորին մասնակցող կանանց նման վարքագիծ՝ պնդելով, թե չեն գնահատում իրենց աշխատանքը։ Սակայն, ինչպես նշվում է, երկար ու ձիգ տարիներ այդպես էլ խնդիրը չէր լուծվել։ Պատասխանատուները պատճառաբանում էին, թե հողի սեփականատերը դիմել է դատարան, իսկ դատավորներն էլ, ըստ էության, առաջնորդվում էին «Էշ, մի սատկի, գարուն կգա» կարգախոսով։
Ֆոտոլրագրողը հայտնում է, որ հիմա կարծես թե դատարանում գործն առաջ է շարժվում։ Այս դրական փոփոխությանը նա վերագրում է Նաիրի Սարգսյանի հետևողական ջանքերը, ով, ինչպես նշվում է, բազմաթիվ պատասխանատու մարմինների դիվադադար անելով, առաջ է տարել գործը ի շահ երևանցիների ու վարորդների։ Նրա ֆեյսբուքյան տեսաուղերձից հասկանալի դարձավ, որ առաջիկայում ճանապարհաշինարարները կարող են գործի անցնել։ Եթե մայրուղին ամբողջությամբ գործի, ապա այդ հատվածում երթևեկությունը կբեռնաթափվի։
Նաիրի Սարգսյանը Ազգային ժողովի «Քաղաքացիական պայմանագիր» խմբակցության պատգամավոր Հայկ Սարգսյանի եղբայրն է։